Helsingforsavtalan skal dagførast

Finskur professari í løgfrøði skal standa á odda hjá teimum, sum kanna, hvussu Helsingforsavtalan kann dagførast.

Tað er Elina Pirjatanniemi, sum skal standa á odda fyri kanningararbeiðnum. 

Hon er professari í løgfrøði í lærda háskúlanum í Åbo.

Afturat sær hevur Elina Pirjatanniemi eitt toymi av serfrøðingum á ymiskum løgfrøðiligum økjum. 

Liðugt í ár

Kanningararbeiðið skal vera liðugt í ár. 

Á heysti í fjør kom tilráðing frá Norðurlandaráðnum til stjórnirnar í Norðurlondum um, at ein norðurlendsk nevnd skal setast at gera ítøkilig uppskot um at dagføra norðurlendsku grundlógina, Helsingforsavtaluna. 

Millum annað skal avtalan dagførast, so limaskapurin hjá Føroyum, Grønlandi og Álandi í Norðurlandaráðnum styrkist og verður meira javnsettur við hini limalondini.