Nógvir fólkatingslimir vildu ikki taka støðu til at hækka pensjónsaldurin

Tað vóru nógvir fólkatingslimir, sum ikki vildu taka støðu til lógaruppskotið um at hækka pensjónsaldurin í Danmark.

77 teirra vóru ikki í tingsalinum, tá atkvøtt var. Teir vóru "fraværende", sum tað stendur í gerðarbókini hjá fólkatinginum.

Teirra millum eru teir føroysku og teir grønlendsku fólkatingslimirnir. 

Fólkatingið samtykti tó at hækka pensjónsaldurin til 70 ár í 2040.

Tað er galdandi fyri tey, sum eru fødd í 1971 ella seinni.

Hækkar upp í 69 ár í 2035

Pensjónsaldurin í Danmark er nú 67 ár.

Men í 2030 fer hann upp í 68 ár og í 2035 upp í 69 ár.

Í fólkatinginum vóru 81 atkvøður fyri at hækka pensónsaldurin upp í 70 ár í 2040.

21 vóru ímóti. Eingin atkvøða var blonk, og 77 atkvøddu ikki.