Kunngerðin um at goyma upplýsingar um fjarskifti er á veg

Løgmálaráðini í Føroyum og Danmark arbeiða við at orða eina kunngerð, sum skal seta í gildi í Føroyum logningsbekendtgørelsen.

Tað er kunngerðin um at goyma upplýsingar um fjarskifti.

Hon hevur heimild í rættargangslógini.

Kunngerðin áleggur telesambands- og internetveitarum at goyma, logga, upplýsingar um samskifti hjá brúkarunum. 

Ikki sjálvt innihaldið, men metadata, tað er, hvør samskiftir, nær, hvar og við hvønn.

Steffan Klein Poulsen, løgtingsmaður, spurdi Bjarna Kárason Petersen, landsstýrismann, um hesa kunngerð.

Kunngerð um logning 

Svarið er, at Løgmálaráðið arbeiðir við at seta í gildi reglur um logning.

Kunngerðin skal áleggja fjarskiftisfyritøkum at skráseta og goyma upplýsingar um nýtsluna hjá endabrúkarum á internetinum, til dømis IP-bústaðir, í ávíst tíðarskeið.

Men fyrst skal vera greitt, um fjarskiftisfyritøkurnar hava neyðugu tøkniligu útgerðina at skráseta og goyma slíkar upplýsingar.

Tað hevur Løgmálaráðið spurt fjarskiftisfyritøkurnar um.

Steffan Klein Poulsen sigur, at í Danmark hjálpir heimildin løgreglu og fregnartænastu at avdúka álvarslig brotsverk, ikki minst mál um barnaporno, sum eru ein alsamt vaksandi trupulleiki. Eisini her í Føroyum.