Bretland og Frakland saman um kjarnorkuvápn

Í yvirlýsingini, sum skal undirskrivast í dag, verður sagt, at londini hava ræði á sínum kjarnorkuvápnum hvør sær, men "at hetta kann samskipast". Yvirlýsingin fer eisini at heimila Bretlandi og Fraklandi, sum eru einastu kjarnorkuveldi í Evropa, saman at svara aftur "eini og hvørjari ekstremari hóttan móti Evropa".

Franski forsetin, Emmanuel Macron, skal skriva undir avtaluna í dag, samstundis sum tríggjar daga langa ríkisvitjan í Bretlandi endar við einum tvílanda toppfundi.

Bretland og Frakland boða samstundis frá, at tey fara at knýta tættari hernaðarlig sambond og bíleggja fleiri sonevndar Storm Shadow rakettir, sum eru langtrøkkandi rakettir, sum londini bæði hava latið Ukraina í krignum móti Russlandi. Rakettirnar eru mentar í samstarvi millum Bretland og Frakland, og partarnir fara nú at arbeiða fram ímóti nýggjari skipan, sum kann koma í staðin fyri rakettirnar, sum fraklendingar kalla Scalp.

- Sum tættir samstarvsfelagar og sameindir í NATO, hava Bretland og Frakland eina langa søgu í verjusamstarvi, og avtalurnar í dag lyfta samstarv okkara upp á næsta stig, sigur bretski forsætisráðharrin, Keir Starmer, í fráboðan.