Trump vil hava hægstarætt at taka støðu til tollásetingarnar

Umsitingin hjá amerikanska forsetanum, Donald Trump, hevur heitt á hægstarætt um at taka støðu til, um nýggju tollásetingarnar eru lógligar, eftir at ein kærudómstólur nýliga staðfesti, at meginparturin av teimum eru ólógligar.

Løgmálaráðið sendi inn kæruna til ameriknaska hægstarætt í síðstu viku. 

Ráðið heitir á ovasta dómstól í landinum um at gera av, um Donald Trump, forseti, hevði myndugleika at seta í gildi umfatandi tollásetingar sambært eini lóg, sum er gjørd at brúka, um landið er í krepppustøðu.

Skuldi hava møguleika at fara til hægstarætt

Tað sæst í rættarskjølunum, sum vóru latin hægstarætti, og sum NBC News hevur fingið innlit í.

29. august segði kærudómstólurin í niðurstøðu, at flestu tollásetsingarnar, sum forsetin hevur sett í verk, eru ólógligar.

Kærudómstólurin vísti kortini kravinum aftur, um alt fyri eitt at strika tollásetingarnar. 

Rætturin letur tollin standa til 14. oktober, fyri at at geva umsitingini hjá Trump tíð at kæra málið víðari til hægstarætt.

Trump skuldsetti í síðsta mánaði kærudómstólin fyri at hava politiska slagsíðu, og løgmálaráðharrin, Pam Bondi, boðaði frá, at avgerðin fór at verða kærd.