Heystsetan í grønlendska landstinginum byrjar í dag

Heystsetan í grønlendska landstinginum Inatsisartut byrjar í dag. Hetta er fyrsti tingfundur eftir valið. Landstingið skal í heystsetuni taka støðu til tilsamans 119 mál. Av hesum eru 17 lógaruppskot, alt frá tíðaráseting til at veita stuðul til uppihald á frítíðarskúla í Føroyum.

Inatsisartut skal eisini viðgera fíggjarlógina, sum longu er løgd fram. Grønlendski landsstýrismaðurin í fíggjarmálum, Múte B. Egede, lýsti í sambandi við fíggjarlógaruppskotið eina dapra mynd av búskapinum í landinum, eitt nú størri útreiðslur og minni inntøkur. 

Men nógv er hent, síðani uppskotið varð lagt fram um hálvan august.

Størri ES-stuðul

Tíðliga í september kom fram, at ES-nevndin skjýtur upp, at ES skal tvífalda stuðulin til Grønland. Og so boðaðu grønlendski landsstýrismaðurin í fíggjarmálum og danska stjórnin frá, at tey hava skrivað undir avtalu um, at Danmark økir sína játtan til Grønlands við tilsamans 1,6 milliardum næstu fýra árini.

Tí eru fortreytirnar fyri fíggjarlógarviðgerðini munandi broyttar.

Heystsetan endar eftir ætlan 12. februar næsta ár, skrivar grønlendska kringvarpið KNR.