Nýggj stjórn í Fraklandi

Fraklendingar fingu nýggja stjórn í gjárkvøldið.

9. september mátti táverandi forsætisráðharrin, François Bayrou, leggja frá sær, tí tað ikki eydnaðist at fáa meiriluta í tjóðartinginum fyri fíggjarlógaruppskotinum. 

Bara eitt samdøgur seinni hevði Emmanuel Macron, forseti, sett 39 ára gamla Sébastien Lecornu í starv sum forsætisráðharri. Lecornu hevur havt tætt samtarv við forsetan og hevur seinastu trý árini verið verjumálaráðharri.

Nú eru hinir ráðharrarnir tilnevndir, og tí kundi Emmanuel Macron í gjárkvøldið boðað frá, at Frakland hevur fingið nýggja stjórn.

Roland Lescure tekur við sum fíggjarmálaráðharri, og fyrrverandi fíggjarmálaráðharrin, Bruno Le Maire, verður nýggjur verjumálaráðharri. 

Annars halda fleiri av ráðharrunum frá stjórnini hjá Bayrou fram. 

Millum annað heldur Jean-Noël Barrot fram sum uttanríkisráðharri, Bruno Retailleau heldur fram sum innanríkisráðharri og Gérald Darmann heldur fram sum løgmálaráðharri.

Frakland hevur skift stjórn ofta seinastu árini. Hetta er fjórða stjórnin seinasta árið, skrivar danska kringvarpið.