Marianna fingið pláss í HM-hópinum

Marianna Geirsdóttir Eystberg er tikin út til HM-hópin hjá hondbóltslandsliðnum, sum um knappan mánað fer undir endaspælið í Trier í Týsklandi.

Bakkurin, sum hevur røtur í Kyndli, men í løtuni spælir við BK Ydun í næstbestu donsku deildini, hevur ikki spælt landsdyst síðan 2022. Hon var við í bruttohópinum, sum vandi saman undan EM-undankappingardystunum móti Íslandi og Montenegro fyri kortum, og Claus Mogensen og Simon Olsen hava givið henni álit.

Maria Halsdóttir Weyhe úr H71 varðveitir plássið, sum hon vann sær seinast, og málverjin Annika Fríðheim Petersen er við aftur eftir barnsburð og tekur dystin um plássið upp aftur við Rakul Wardum og unga stjørnuskotið Gyltu á Neystabø.

Pláss er fyri 16 spælarum á dómaraseðlinum til hvønn dyst. Føroyska liðið savnast aftur tann 17. november til venjingar í Føroyum. Leygardagin 22. november spæla Føroyar venjingardyst móti Íslandi Við Tjarnir, áðrenn leiðin gongur til Týsklands 24. november.

Í mun til EM-hópin í fjør eru Brynhild Pálsdóttir, Bjørk Franksdóttir Joensen og Lukka Arge ikki við hesa ferð. Harafturat hava Brynja Høj og Turið Arge Samuelsen takkað fyri seg á landsliðnum. Gylta á Neystabø, Karin Egholm, Vár Bentsdóttir Zachariasen, Maria Halsdóttir Weyhe og Marianna Geirsdóttir Eystberg skulu royna seg í endaspæli fyri fyrstu ferð.

Føroyski HM-hópurin:

Málverjar
Annika Fríðheim Petersen, EH Aalborg (Danmark)
Rakul Wardum, Ringkøbing Håndbold (Danmark)
Gylta á Neystabø, Kyndil

Vengur
Lív Sveinbjørnsdóttir Poulsen, VÍF
Karin Egholm, H71
Rannvá Olsen, Ejstrup/Hærvejen (Danmark)
Anna Elisabeth Halsdóttir Weyhe, H71

Strikur
Pernille Brandenborg, Storhamar (Norra)
Bjarta Osberg Johansen, Kyndil
Vár Bentsdóttir Zachariasen, Ajax København (Danmark)

Bakkar
Elsa Egholm, Ajax København (Danmark)
Jana Mittún, Viborg HK (Danmark)
Maria Pálsdóttir Nólsoy, HH Elite (Danmark)
Súna Krossteig Hansen, Skanderborg Håndbold (Danmark)
Lív Bentsdóttir Zachariasen, Ajax København (Danmark)
Marita Mortensen, HØJ (Danmark)
Marianna Geirsdóttir Eystberg BK Ydun (Danmark)
Maria Halsdóttir Weyhe, H71

HM-leikskráin hjá Føroyum:

Mikudagin 26. november kl. 19.30: Montenegro – Føroyar
Fríggjadagin 28. november kl. 19.30: Spania – Føroyar
Sunnudagin 30. november kl. 14.30: Føroyar – Paraguay