Russland: Fregnartænastan hjá donsku verjuni villleiðir

Fregnartænastan hjá donsku verjuni villleiðir, sigur russiska sendistovan í Danmark, nú fregnartænastan í nýggjari hóttanarmeting sigur, at hernaðarliga hóttanin úr Russlandi fer at vaksa næstu árini.

Tað sigur sendistovan í skrivligum boðum til danska TV2 í gjár.

Eisini sigur sendistovan, at Danmark leggur upp til eina spentari støðu við m.a. at steðga innflutningi av russiskum gassi og olju.

NATO fyrireikar seg til kriggj

- Russland hevur ongan áhuga í einum kríggi við Evropa, heldur ikki í Eystrasalti. Tað er ikki Russland, men NATO-londini, sum fyrireika seg til kríggj, sigur russiska sendistovan millum annað.

Fyrradagin kom fregnartænastan hjá donsku verjuni út við frágreiðingini, nevnd Útsýni.

Fyrr í ár gav fregnartænastan hjá donsku verjuni út eina hóttanarmeting, har sagt varð, at hernaðarliga hóttanin úr Russlandi fer at vaksa næstu árini.

Tá stóð í henni, at eingin hóttan var um beinleiðis álop á Danmark.

Sama er galdandi í nýggju metingini, sum sigur, at hernaðarliga hóttanin frá Russlandi móti NATO fer at økjast.