Lars Christiansen væntar sær nógv av Óla Mittún

Óli Mittún er ein av ungu spælarunum, sum legendariski danski vongurin Lars Christiansen væntar sær mest av undir EM-endaspælinum í Danmark, Norra og Svøríki.

 - Eg eri hugtikin av hasum ungu spælarunum úr Føroyum, so eg velji Óla Mittún, sigur Lars Christiansen við EHF, sum hevur biðið danan valt ein spælara til 'Rising star'-bólkin.

Fyrrverandi landsliðsvongurin, sum var við á danska liðnum, ið vann EM í 2008 og 2012, nevnir eisini svian Axel Månsson og Ian Barrufet úr Spania.

Fyrrverandi  strikuspælarin hjá Svøríki Magnus Wislander nevnir landsmannin Nikola Roganović, meðan fyrrverandi spanski vongurin Victor Tomàs nevnir Costa-brøðurnar hjá Portugal.

Hóast Danmark ikki hevur vunnið EM síðan 2012, peika allir tríggir serfrøðingarnir hjá EHF á danir sum stórfavorittar til at vinna sjálva kappingina.