Sveisiskur liðfelagi úr Kiel: Vónar at Elias verður við í annaðkvøld

Vanliga fær hann ágóðan av nógvu góðu innspølunum hjá Eliasi Ellefsen á Skipagøtu í týska stórfelagnum THW Kiel. 

Nú vónar sveisiski strikuspælarin Lukas Laube, at føroyska landsliðsstjørnan verður klárur til fyrsta dystin í bólkaspælinum í annaðkvøld. Ella tað sigur hann í øllum førum.

 - Eg gleði meg til dystin, og eg vóni at sleppa at spæla ímóti Eliasi. Vónandi gongur væl við hansara uppvenjing, sigur Lukas Laube við Kringvarpið.

 - Hetta er ein lykladystur, tí Føroyar eru eitt sterkt lið, og øll kunnu vinna á øllum í hesum bólkinum, heldur strikuspælarin úr Kiel.

Fyrireika seg til sjey ímóti seks

Tað kemur neyvan óvart á nakran, sum ger sítt heimaarbeiði, at Føroyar spæla nógv sjey ímóti seks-álopsspæl. Júst heimarbeið hevur sveisiski venjarin gjørt.

Sum spælari í millum annað Rhein-Neckar Löwen í týsku Bundesliguni, hevur Andy Schmid nógvar royndir við yvirtalsspæli, og hann viðgongur eisini, at Sveis hevur fyrireika seg væl upp á føroyska 'spesialitetin'.

 - Føroyar hevur ment sín máta at spæla hondbólt upp á við góðum úrslitum, og tí mugu vit vera til reiðar upp á ein truplan dyst, sigur sveisiski venjarin.

 - Roykur kemur úr høvdinum á mær eftirhondini, og tí eri eg glaður fyri, at dysturin endiliga verður í annaðkvøld.