Danska stjórnin fær størri undirtøku frá veljarunum

Berlingske skrivar, at hetta ber boð um, at Mette Frederiksen og Lars Løkke Rasmussen hava dugað væl at handfarið størstu uttanríkispolitisku kreppu síðani seinna heimsbardaga

Hevði fólkatingsval verið nú, hevði sosialdemokratiski flokkurin hjá Mette Frederiksen, forsætisráðfrú, fingið 23,1 prosent av atnkvøðunum.

Mynd: Ritzau Scanpix

Katrin Petersen

27.01.2026 - 15:03

Danska stjórnin hevur nú størri undirtøku millum veljararnar.

Veljarakanningar í Danmark vísa, at var val í dag, hevði stjórnin fingið 40,9 prosent av atkvøðunum. Hetta er væl meir enn fyri fimm vikum síðani, tá kanningar vístu, at l SVM-stjórnina fekk 32,7 prosent av atkvøðunum.

Danska blaðið Berlingske skrivar, at hetta ber boð um, at danir eru væl nøgdir við handfaringina hjá Mette Frederiksen og Lars Løkke Rasmussen av størstu uttanríkispolitisku kreppuni síðani annan heimsbardaga.

Lars Løkke Rasmussen, 16:9

Tað hevur riðið um snarið, um Moderatarnir hjá Lars Løkke Rasmussen, uttanríkisráðharra, fóru at røkka upp um tinggáttina. Men nýggjasta veljarakanningin vísir, at Moderatarnir høvdu fingið sjey prosent av atkvøðunum. (Mynd: Bjarni Arting Rubeksen)

Verður val?

Sosialdemokratarnir standa til at fáa 23,1 prosent av atkvøðunum. Fyri einum mánaði síðani var talið 18,9 prosent.

Moderatarnir standa til sjey prosent afturímóti 2,8 prosentum fyri einum mánaði síðan. Triði stjórnarflokkurn, Vinstri, stendur í stað á 10,8 prosentum.

Hesi tølini eru øll frá Voxmeter, men aðrar kanningar, sum danskir miðlar gjørdu í seinastu viku, vístu somu gongd.

Berlingske viðmerkir, at við hesi framgongdini mann tað vera meira freistandi hjá Mette Frederiksen at útskriva fólkatingsval nú enn fyri fáum vikum síðani.