Trump ringdi til Jens-Frederik Nielsen beint eftir grønlendska valið

Jens-Frederik Nielsen, landsstýrisformaður í Grønlandi, upplýsti í landstinginum í dag, at amerikanski forsetin, Donald Trump, ringdi til sín og ynskti til lukku við landstingsvalinum.

- Eg var ringdur upp, og amerikanski forsetin ynskti til lukku. Hetta var, áðrenn eg gjørdist formaður í Naalakkersuisut, segði Jens-Frederik Nielsen, sambært Sermitsiaq.

Landstingið, Inatsisartut, hevur orðaskifti í dag um viðurskiftini millum Grønland og USA,.

Landsstýrisformaðurin legði aftrat, at Donald Trump hevur ikki ringt til sín, síðani hann gjørdist landsstýrisformaður. 

Pele Broberg, formaður í flokkinum Naleraq, sigur, at amerikanska umsitingin vendi sær til sín um at fáa samband við Jens-Frederik Nielsen. Boðini vóru at ynskja valevninum, sum hevði fingið flestar atkvøður á valinum, til lukku. 

Donald Trump í Davos

Serstakliga torfør støða

Landsstýrisformaðurin segði í røðu síni fyri landstinginum, at Grønland hevur seinastu 14 mánaðirnar verið í einari serstakliga truplari støðu. 

- Tað er harmiligt, at USA fleiri ferðir hevur sagt, at tað vil taka Grønland, segði hann. 

- Amerikanski forsetin er, bæði fyri og eftir, at hann tók við, komin við slíkum útsagnum uttan at taka tær aftur. Boðini og málini eru: USA skal taka og stýra Grønlandi.

- Fyri stuttum var víst aftur, at talan verður ikki um at taka Grønland við valdi, men støðan er óbroytt: Grønland skal knýtast at USA, sum eisini skal stýra Grønlandi, segði Jens-Frderik Nielsen. 

Hann sigur, at  Naalakkersuisut heldur fast við, at hesar útsagnir kunnu ikki góðtakast. Grønland er partur av kongsríkinum, og fer at halda fram at mennast sambært Sjálvstýrislógini.