Rutte: Russland vísir vantandi vilja til frið

At Russland heldur fram at leypa á Ukraina vísir vantandi russiska viljan til frið.

Tað segði Nato-aðalskrivarin, Mark Rutte, tá hann hitti ukrainska forsetan, Volodymyr Zelenskyj, í høvuðsstaðnum Kyiv í dag.

Rutte vitjar Ukraina samstundis sum Russland í nátt framdi álop á fleiri ukrainskar býir og orkuverk. Sambært The Kyiv Independent vóru í minsta lagi níggju fólk særd.

Avgerandi fyri trygdina

Nato-aðalskrivarin segði í røðu fyri ukrainska tinginum, at stuðulin frá teimum sameindu til Ukraina er ikki at vika. 

- Ukraina er og verður framvegis avgerandi fyri okkara trygd, segði Mark Rutte.

Almenna russiska tíðindastovan Tass skrivar, at álopini í nátt vóru hevnd fyri ukrainsk álop á Russland seinastu tíðina. 

Friðarsamráðingar í morgin

Friðarsamráðingarnar um Ukraina millum USA, Russland og Ukraina verða tiknar uppaftur í morgin í Abu Dhabi, skriva ukrainskir og russiskir miðlar. 

- Vit fara at halda fram at økja trýstið á Russland og at halda at veita Ukraina stuðul, segði Mark Rutte.