Hava ikki nóg gott tilfar at kunna góðkenna Suðuroyartunnilin

Landsverk sigur seg ikki hava fingið nóg gott tilfar til at kunna góðkenna Suðuroyartunnilin.

Í høvuðsheitum, tí óheftir partar ikki hava gjørt tilfarið.

Tað er annars ein treyt í slíkum førum.

Hetta hevur tunnilsfelagið fingið at vita frá Landsverki tvær ferðir.

Tað sæst í svari frá Landsverki til Løgmansskrivstovuna, sum spurdi, hvat Landsverk meinar við, tá stovnurin sigur, at tilfarið ikki er nøktandi til góðkenningararbeiðið.

Fundur í dag

Aftur í dag skulu Løgmansskrivstovan og partafelagið Suðuroyartunnilin í fíggjarnevndina, sum viðger uppskotið um Suðuroyartunnilin.

Fíggjarnevndin skal lata álit um Suðuroyartunnilin í næstu viku, 18. februar.

Eyðgunn Samuelsen, forkvinna í nevndini, hevur sagt við Kringvarpið, at tað fer nevndin at gera.

11 onnur mál eru á skránni hjá fíggjarnevndini í dag.