VÍF stríddi seg í steypafinaluna ímóti treiskum neistum

VÍF var bert frammanfyri í ein hálvan minutt av teimum báðum hálvfinalunum ímóti Neistanum, men viðhvørt er tað nóg mikið.

Seina leiðslumálið, sum vestmannakvinnur høvdu við sær úr Havn mikukvøldið, var júst tað, sum sunnudagin sendi tær gulu í steypafinaluna við Tjarnir.

Tað var ikki uttan stríð. Í fyrra dystinum fekk Neistin sera góða byrjan, og so var aftur í Vestmanna. Áðrenn heimaliðið hevði blunkað, hevði Neistin skorað fýra ferðir, og útiliðið helt fast í leiðsluni næstan allan dystin. 

Men tað var bara næstan, tí tá tveir minuttir vóru eftir javnaði Fríða Nolsøe Olsen til 24-24 við einum av sínum 13 málum.

Neistin svaraði aftur eina ferð, men Fríða Nolsøe Olsen javnaði aftur við brotskasti til 25-25, og so var leyst og liðugt. Fagnaðurin var stórur millum tey gulu í høllini, meðan vónbrotið var stórt hjá teimum bláu, sum høvdu verið so nær við.

Mótstøðuliðið hjá VÍF næsta vikuskiftið verður Kyndil. Tær grønu vunnu stórsigur í Hoyvík í vikuni, og so nyttaði einki, at H71 vann við einum máli á Hálsi leygardagin.

Hjá monnum spæla Kyndil og H71. Hoyvíkingar smurdu KÍF av í báðum hálvfinalunum, meðan Kyndil tvær ferðir vann sannførandi í grannauppgerðini ímóti Neistanum.

Steypafinalurnar vera við Tjarnir í Hoyvík næsta leygardag og Kringvarpið sendir tær beinleiðis í sjónvarpinum.