Adrenaline: Í Føroyum roynast sangir á føroyskum best

Hesa ferð vitjar ein ungur og virkin bólkur úr Klaksvík, ið hevur vunnið sær trivaligan fjepparaskara.

Adrenaline er navnið.

Bólkurin hevur sín uppruna í ungdómshúsinum, Húsið, í Klaksvík. 

Mynd: Bárður Lydersen

Hans Edward Andreasen tók dreingirnar til sín, og teir fóru undir at læra seg at spæla ljóðføri.

Áðrenn langt var umliðið vóru teir farnir undir at skriva egin løg.

Síðani hevur tað gingið ógvuliga skjótt. Spælingar á Spotify eru nógvar, og teir eru ein vælumtóktur konsertbólkur.


Mynd: Bárður Lydersen

Og júst tað at standa á pallinum er nakað serligt, siga teir við ein mun.

- Vit skulu vísa fjøldini, at vit hugna okkum. Tí gera fólkini eisini tað, gevur tað bólkinum eyka orku.

Longu nú er greitt, at teir skulu spæla til stóra FMA-tiltakið í Norðurlandahúsinum, sum eisini verður víst beinleiðis í sjónvarpinum.

Harumframt eru avtalur í summar komnar í kalendaran, men tað er ikki nakað, ið teir fáa sagt alment enn.


Mynd: Bárður Lydersen

Millum hittini hjá Adreanline kunnu nevnast Spillikassin, DNA og so sangurin, sum var millum teir fremstu í kappingini um at gerast Ársins útvarpshitt, Tóm Visjón.

Mynd: Bárður Lydersen

Í lýsingini á Spotify stendur stutt og greitt: Adrenaline er ein føroyskur popp/rokk bólkur. Vit larma - tú lurtar.