Tørvur á serstakari lóg um árinsmetingar

Náttúruverndarlógin frá 2024 ásetir, at margfeldið og vistfrøðiligu skipanirnar í náttúruni skulu røkjast fyri náttúruna sjálva. Eisini ásetir lógin, at náttúran skal røkjast sum grundarlag undir burðardyggum virksemi, tilfeingi, mentan, heilsu og trivnaði.

At tað stendur í lógini, at náttúran skal kunna vera náttúra, er eitt framstig, tí var náttúran bara til hjá menniskjum at brúka, var talan um ein sera avmarkaða náttúrufatan, segði Sigga Jacobsen, deildarleiðari á Umhvørvisstovuni, í 1. parti í útvarpsrøðini ”Oyggjar undir trýsti”.

Samstundis staðfesti hon, at náttúran er ikki nóg væl vard, tí ongin sjálvstøðug lóg um árinsmetingar er í gildi í Føroyum. Tílík krøv eru bara í ymsum serlógum, eitt nú elveitingarlógini, kolvetnislógini, havumhvørvislógini og lógini um Suðuroyartunnilin.

- Í øðrum londum hava tey eina sjálvstøðuga lóggávu um árinsmetingar, har eitt yvirlit er yvir sløg av verkætlanum, sum krevja ítøkiligar og strategiskar árinsmetingar. Vit síggja ein stóran tørv á at fáa ein serstaka lóg um árinsmetingar í Føroyum, tí vit missa jú náttúru og vita ikki, hvat vit missa, tí onki er skrásett, segði Sigga Jacobsen.

Hon varð síðan spurd, um ov nógv náttúra verður mist í Føroyum, tí ongin tílík lóg er í gildi í Føroyum. Sigga Jacobsen svaraði:

- Tað er ilt at siga, men vit vita, at verkætlanir fara fram, uttan at gjørdar verða árinsmetingar, og tað merkir, at vit vita ikki, hvat vit missa. Tað er týðiligt, at vit missa lendi, har ongin skráseting er, og har ikki verður planlagt eftir náttúru og umhvørvi.

oyggjar_undir_trysti_3_partur.png

Hvat: Oyggjar undir trýsti
Hvar: Í útvarpinum og á KVF Ljóð
Nær: Mánadagar kl. 17.05, og tá tað passar tær á KVF Ljóð

Hoyr fyrsta part av fýra her: