Einki sjóverjuskip tøkt: Polarhav mátti sleipa Stjørnuna

Stjørnan og Polarhav vóru til fiskiskap norðanfyri í gjár, tá óljóð brádliga kom frá girinum umborð á Stjørnuni.

Boðað varð frá til MRCC, men av tí at einki sjóverjuskip var tøkt, vóru boðini, at partrolararnir máttu klára seg sjálvir.

Tí tók Polarhav makkaran upp á sleip og sleipaði Stjørnuna til Klaksvíkar. Sleipið tók umleið 12 tímar.

– Tíbetur var veðrið gott. Var meira sjaskut í sjónum, hevði støðan verið verri, sigur Olivar Krosstig, skipari á Stjørnuni.

Fólk hava hugt eftir girinum bæði í gjár og í dag, og ætlanin er, at Stjørnan og Polarhav fara nýggjan túr í kvøld.