Amy syfti Anju: - Tað er stórt at vinna

 - Tað er stórt, tí hon er tann besta. Hon var tann besta í Føroyum og hevur skotið nógv longur enn eg havi, segði Amy við Rætt leygardagin.

19 ára gamli bogaskjúttin, sum bert hevur skotið við compound-boganum í eitt hálvt ár, hevði júst vunnið á Anju Eydnudóttir í finaluni um føroyameistaraheitið í uttandura skjóting.

Við sínum royndum var Anja Eydnudóttir stórfavorittur, men tapið kom ikki óvart á hana, og royndi skjúttin Jóannes Poulsen var heldur ikki bilsin.

 - Eg eri ikki yvirraskaður av úrslitinum, segði skjúttin úr Ørvi.

 - Hon trenar ræðuliga nógv og er ræðuliga seriøs. Anja hevur ikki verið líka aktiv, sum Amy hevur verið, so eg síggi tað, sum nakað, sum eigur at henda, sum fer at henda, tí tann, sum venur, kemur fram, segði Jóannes Poulsen.

Finalan var sera jøvn, og tær báðar fylgdust trý tey fyrstu umførini, sum endaðu 27-27, 28-28 og 28-28. 19 ára gamla Amy við Rætt var kortini kaldari til endans og vann tvey tey seinastu umførini ávíkavist 29-28 og 27-26 og finaluna samanlagt 139-137.

 - Eg haldi ikki, tað er skelkandi. Eg haldi faktiskt, tað er deiligt. Sjálvandi vilt tú vinna, men eg eri bara eyka glað fyri, at eg havi fingið kapping, tí at standa einsamøll og skjóta og fáa gullið, er einki stuttligt. So vil eg heldur tapa tað, segði Anja Eydnudóttir.