Óttast framvegis yvirgang í París

Tey plaga at koma til París á jólum hvørt ár - tey nógvu ferðafólkini. Men í ár eru tey ikki so mong, ið vitja París á jólum.

Óttin fyri yvirgangi fær í ár ferðafólk at setast aftur. Higartil er flogferðslan til París á jólum minkað við einum triðingi sammett við onnur ár.

Eisini teir smáu bátarnir, ið sigla við ferðafólkum í Seine-ánni í París, merkja óttan fyri yvirgangi. Bátarnir hava siglt útivið 30 prosent færri fólk hesi jólini.

Nýggjar handtøkur gjørdar

Samstundis sum ferðavinnan í franska høvuðsstaðnum er merkt av afturgongdini hesi jólini, boða myndugleikarnir í Belgia frá nýggjum handtøkum.

Belgisku myndugleikarnir hava handtikið ein 30 ára gamlan mann, ið er skuldsettur fyri at hava viðvirkað til yvirgangsálopini í París 13. november.

130 fólk lótu lív í yvirgangsálopunum í franska høvuðstaðnum, París, fyri seks vikum síðani. Harumframt vórðu hundraðtals onnur eisini særd.