Fangalegan í Guantanamo verður stongd

- Latið okkum gera tað, sum er rætt fyri USA. Latið okkum hyggja frameftir og enda henda kapittulin, segði Obama í sambandi við, at ætlan um at steingja leguna varð kunngjørd í gjár.

Tað fer at kosta millum 290 og 475 milliónir dollarar at flyta fangar og at steingja leguna, skrivar Reuters-tíðindastovan.

SÍ EISINI Obama ger enn eina roynd at steingja Guantanamo

Í løtuni sita 91 fangar avbyrgdir í leguni - uttan fyri lóg og rætt. Men sambært amerikonskum myndugleikum verða 35 fluttir til onnur lond í ár.

Sostatt eru gott 60 fangar eftir, ið sambært ætlanini verða fluttir til hernaðarfongsul ella sivilfongsul í USA.

Vænta at spara 543 milliónir um árið

Fangalegan í Kuba máar støðið undan trygdini hjá USA og virkar ímóti ætlanunum við henni, tá tað snýr seg um samskifti við onnur lond, sigur Barack Obama.

Verjumálaráðið fer sambært Barack Obama at spara 80 milliónir dollarar um árið við at steingja leguna. Obama lovaði at steingja fangaleguna, tá hann tók við sum forseti í 2009, men nú fer tíðin at ganga undan hjá honum.

Í januar 2017 er forsetaskeið hansara runnið. Fyrstu fangarnir komu til Guantanamo Bay úr Afganistan í 2002. Tað hava verið upp í 680 fangar í leguni í senn, nú eru 91 eftir.