Mæla frá at spreingja fjallið við Uumanaq-fjørðin

Serfrøðingar mæla frá at spreingja fjallið burtur við Uumanaq-fjørðin, sum stendur til at leypa.

Tað sigur náttúru- og umhvørvismálaráðið í Grønlandi, sum saman við danska jarðfrøðisstovninum GEUS stendur fyri kanningunum av fjallasíðunum í økinum.

- Spreingingar fara at hava við sær ein ókendan og óforútsigiligan vanda fyri at ávirka onnur veik øki í fjallinum ella skapa nýggjar veikleikar, skrivar ráðið í eini fráboðan.

Serfrøðingarnir óttast fyri, at spreingingin elvir til nýggj óstøðug øki í fjallinum, sum kunnu flyta seg í fleiri ár eftir kontrolleraðu spreingingina. Við hesum kann ein spreinging gera støðuna verri heldur enn at bøta um stabilitetin í fjallinum, sigur náttúru og umhvørvismálaráðið.

Myndugleikarnir kanna nú møguleikarnar fyri einari ávarðingarskipan í økinum.

Tríggjar bygdir framvegis avbyrgdar

- Í øðrum londum hava tey royndir við ávaringarskipanum. Millum annað arbeiða vit við einari sms-ávaringarskipan, og vit vóna at kunna siga meira um tað næstu dagarnar, sigur Tine Pars, deildarstjóri í heilsumálaráðnum og limur í tilbúgvingarnevndini.

Tað var seinasta vikuskifti, at eitt omanlop í Uumanaq-fjørðinum elvdi til eina flóðaldu, sum skolaði inn yvir nakrar bygdir í økinum. Fýra fólk eru ikki afturíafturkomin, og myndugleikarnir boðaðu frá í vikuni, at tey helst eru deyð. Hini fólkini úr bygdunum eru flutt burtur til tryggari øki.

Sjóverjuskipið Vædderen hevur eftirlit við fjallinum, sum stendur til at leypa, og hendir nøkur rørsla har, verður fráboðað beinanvegin. Myndugleikarnir vilja hava størri vissu um stabilitetin í fjallinum, áðrenn fólk sleppa heimaftur.

Nakrar bygdir verða tó mettar at vera vandaleysar at vera í, boðaði polittið frá í tíðindaskrivi í gjárkvøldið. Men í trimum bygdum sleppa fólk ikki heim aftur enn.