Høgni ger sjálvur tillagingar í veiðigjaldinum

Vinnunevndin hjá løgtinginum hevur fingið níggju broytingar, ella tillagingar, sum hann kallar tær, til lógaruppskotið um veiðigjald frá Høgna Hoydal, landsstýrismanni.

Høgni Hoydal sigur, at tillagingarnar eru gjørdar eftir fundir við Vinnunevndina og innanhýsis umrøðu í Fiskimálaráðnum.

Orðið nettosøla í uppskotinum verður broytt til søluvirðið av veiðuni, tí ógreitt er, hvat nettosøla er. 

Ein onnur tillaging er, at veiðigjaldið skal gerast upp grundað á teir prísir, sum eru tøkir, tá útrokningin skal gerast.

Revsing í kunngerðir

Og fyribils veiðigjaldið skal eisini rindast fyri landaða nøgd, ikki bara fyri avreidda nøgd, so fyribils veiðigjaldið líkist meira tí endaliga.

Ein onnur broyting er, at rentan verður roknað frá tí degi, sum veiðigjaldið fellur til gjaldingar, - tað er fyrsti í mánaðinum, og ikki sum nú stendur í uppskotinum, tá gjaldsfreistin er, hon er 20'unda.

Rentan er 0,7 prosent um mánaðin.

Og skotið verður upp at seta inn í lógina heimild at áseta revisreglur í kunngerðum, sum hava heimild í lógini.