Danir fara at virða føroyskt viðhald í trætumáli

Ger kompetansunevndin niðurstøðu til frama fyri Føroyar, fara danir sjálvandi at viðurkenna hana.

Men møguleikin at leggja ein spurning fyri nevndina broytir ikki tann veruleika, at danskir myndugleikar hava ábyrgdina av lógum, sum eru samtyktar í fólkatinginum, eisini, hvussu hesar lógir eiga at tulkast.

Tað sigur danski unntanríkisráðharrin, Anders Samuelsen, í svari til Magna Arge, fólkatingsmann. 

Nú er høvið at brúka kompetansunevndina í heimastýrislógini fyri fyrstu ferð, sigur Magni Arge.

Tí so fæst at vita, hvat Hægstirættur heldur um uttanríkispolitisku lógina hjá Føroyum.  

Avtalan ella yvirlýsingin  í Útnorðri

Lív er framvegis í kjakinum um avtaluna, sum landsstýrini og stjórnin í Útnorðri gjørdu síðst í august í fjør. Og sum danska stjórnin hevur ógildað.

Anders Samuelsen sigur, at danskir myndugleikar tulka lógir, sum fólkatingið hevur samtykt.

Uttanríkispolitiska lógin hjá Føroyum er tó eisini samtykt í løgtinginum.  

Ein einvís donsk tulking er tí í ósamsvari við heimastýrislógina, sigur Magni Arge.

Hann vísir til kompetansunevndina, sum er eitt slag av gerðarrætti í heimastýrislógini.

Avgerðin hjá Hægstarætti 

Í lógini stendur, at eru partarnir, Føroyar og Danmark, ósamdir, skal ein kompetansunevnd setast.

Í henni skulu vera tvey umboð fyri landsstýrið, tvey fyri stjórnina og tríggir hægstarættardómarar. 

Eru umboðini hjá landsstýrinum og stjórnini ikki samd, skulu teir tríggir hægstarættardómararnir skera ígjøgnum. 

Ov lítil træta

Men líkt er til, at hetta málið fer ikki í nakra kompetansunevnd. 

Landsstýrið vil ikki. 

Hetta málið er ov lítið, segði Poul Michelsen, landsstýrismaður í uttanríkismálum, við Útvarpið herfyri.

Magni Arge heldur, at bara hóttanin um, at eitt mál endar í kompetansunevndini, kann fáa danir til at taka føroysk ynski um broytingar í størri álvara.

Kompetansunevndin í heimastýrislógini er ongantíð brúkt fyrr.