Línuskip mótmæla kvotubýtið á Flemish Kap

Í skrivi til Høgna Hoydal, landsstýrismann í fiskimálum og vinnunevndina hjá løgtinginum grundgevur felagið fyri, hví línuskipini og ikki "kyrrahavsloyvini" skulu sleppa at fiska tey 450 tonsini av toskakvotu, sum Føroyar fáa í býtisavtalu við kvotu av rossamakreli í Suðurkyrrahavinum.

Felagið vísir á trý viðurskifti í fiskivinnuni, sum Felagið Línuskip onga ávirkan hevur á, men sum hava sent línuskipini á eina "fíggjarliga oyðimarkargongd" seinastu 10 til 12 árini.

Toska- og hýsustovnarnir á landgrunninum eru í undantaksstøðu, og hava verið tað í nógv ár. 

Vantandi atgongd til nýtt tilfeingi er ein forðing hjá línuskipunum. Og skiftandi landsstýri hava heldur ikki megnað at býtt um nýggj virði av uppsjóvarfiski við nýggj rættindi av botnfiski til línuflotan at fiska.

Fiskivinnuráðið mælir í sínum hoyringarsvari til, at landsstýrismaðurin letur línuskipunum nýggju toskakvotuna.

Men Høgni Hoydal heldur fast við sína ætlan um, at reiðaríini við "kyrrahavsloyvunum" skulu hava toskakvotu á Flemish Kap.

Landsstýrismaðurin letur tí 450 tons av nýggjari toskakvotu á Flemish Kap til tey, sum eiga loyvi at royna eftir rossamakreli í Suðurkyrrahavinum.

Hóast hoyringarfreistin er farin, so heitir Felagið Línuskip nú staðiliga á landsstýrismannin um at endurskoða ætlanina.

Kunngerðin um fiskiskapin á Flemish Kap er framvegis ikki lýst.