Amerikanskar fyritøkur flyta virksemið úr Kina

Fyritøkurnar eru samstundis farnar undir at kanna, hvagar virksemið kann flytast. Talan er í stóran mun um amerikanskar fyritøkur, sum hava havt góð gróðrarlíkindi í Kina.

Men nú tollur er lagdur á teirra vørur í USA, er ikki longur so áhugavert at arbeiða í Kina.

Talan er fyrst og fremst um fyritøkur, sum gera tekniskar lutir, og tær hava ofta virksemi í fleiri londum. Tí umrøða tær nú, hvagar best er at flyta virksemið.

Handilskríggið ímillum USA og Kina byrjaði í mars, tá Donald TRump, forseti gjørdi av at leggja toll á stál og aluminium úr Kina.

Serfrøðingar siga støðuna ikki vera batnaða, heldur tvøturímóti, so tykist stríðið at verða harðnað.

Fleiri fyritøkur hava sagt, at tað er so kostnaðarmikið at flyta virksemið úr Kina, at tað helst verður dýrari at keypa vørurnar.

Fyritøkurnar siga seg vænta og vóna, at ein loysn verður funnin á handilsósemjuni.