G7 krevur svar um Khashoggi

Uttanríkisráðharrarnir í sonevndu G7 londunum krevja nú, at málið um horvna, saudiarabiska tíðindamannin, Jamal Khashoggi, sum hvarv í Turkalandi fyri tveimum vikum síðan, verður kannað gjølla.

Í eini felags fráboðan siga ráðharrarnir, at tey vænta, at Saudi Arabia ger eina neyva, álítandi, opna og skjóta kanning av málinum. Tey siga í sama viðfeingi, at tey vilja verja talufrælsið og fjølmiðlafrælsið.

Jamal Khashoggi hvarv eftir at hann fór á saudiarabisku sendistovuna í Turkalandi fyri tveimum vikum síðan.

Khashoggi flýddi úr Saudiarabia til Turkalands fyri at fáa frið at skriva atfinningarsamar greinar um saudiarabiska kongshúsið.

Illgruni er um, at Kashoggi er myrdur í eini avhoyring, sum gekk harðliga fyri seg. Bæði turkiskar og amerikanskar fregnartænastukeldur siga seg hava prógv fyri, at Kashoggi er myrdur. Hetta er tó ikki váttað.

Tilburðurin hevur sett sambandið millum Saudi Arabia og samstarvslondini í vesturheiminum undir trýst.

G7 londini eru Kanada, Frakland, Týskland, Italia, Japan, Bretland og ES.