Trudeau hevur hoyrt upptøkur av Khashoggi-drápinum

Kanadiska fregnartænastan hevur hoyrt eina upptøku, tá tíðindamaðurin Jamal Khashoggi, var dripin á saudiarabiska konsulatinum í Istanbul.

Tað váttar kanadiski forsætisráðharrin, Justin Trudeau, sum er í Paris.Tað er Turkaland, sum hevur upptøkuna.

Khashoggi fór inn á konsulátið 2. oktober, men hann kom ongantíð út aftur. Eftir stórt trýst hevur saudiarabia viðgingið, at hann varð dripin á konsulátinum.

Turkiski forsetin, Erdogan, hevur seinni sagt, at Turkaland hevur eina upptøku av drápinum, og at myndugleikarnir í USA, Bretlandi, Týsklandi og Fraklandi hava fingið avrit av upptøkuni.

Einki av teimum londunum vilja gera nakrar viðmerkingar til málið, men kanadiski forsætisráðharrin heldur ikki, at nakað má fjalast.

Forsætisráðharrin sigur, at kanadiska fregnartænastan hevur samstarvað við turkisku fregnartænastuna um málið, og veit um alt, sum turkar vita um málið.

Franski uttanríkisráðharrin sigur, at so vítt hann veit, hevur Frakland ikki fingið nakað avrit av upptøkuni.

Ovastin í CIA, Gina Haspel, var í Turkalandi seinast í oktober, og har hoyrdi hon upptøkuna, skrivar AP.