Kina krevur fíggjarstjóran leyslatnan

Amerikanski sendiharrin í Kina er boðsendur í uttanríkisráðið í Beijing at taka ímóti einum mótmæli ímóti, at fíggjarstjórin í kinesiska telerisanum, Huawei, er handtikin í Kanada.

Kravið er, at Meng Wanzhou, fíggjarstjóri, verður útflýggjað USA. 

Meng, sum er dóttir stovnaran av Huawei, varð handtikin 1. desember í Vancouver í Kanada.

Hon kom fyri rættin fríggjadagin, tí ætlanin var at útflýggja hana til USA, men viðgerðin av amerikansku áheitanini varð útsett til í gjár.

Kina krevur, at USA tekur boðini um handtøkuna aftur í stundini, skrivar kinesiska tíðindastovan, Xinhua.

Leygardagin varð kanadiski sendiharrin í Kina, John McCallum, boðsendur til fundar í kinesiska uttanríkisráðnum.

Hann fekk at vita, at tað fær álvarsamar avleiðingar, verður Meng ikki latin leys.

Málið um fíggjarstjóran í Huawei sáar iva um, um vápnahvíldin í handilskrígnum millum USA og Kina fer at halda.