Vinnuøkið á Gomlurætt framvegis á skránni

Vinnuøkið við Gomlurætt er framvegis aktuelt. Tað verður á býráðsfundi í Havn í annaðkvøld. Býráðið skal viðgera spurningin, um kommunan skal keypa vinnuøkið norðan fyri Gomlurætt fyri 28 milliónir krónur at gjalda í 2022 og 2023.

Vinnuøkið skal gerast við gróti úr Sandoyartunlinum og stórt grót til brimverju skal fáast úr einum grótbroti oman fyri Gomlurætt. 

Tað kostar kommununi 40 milliónir krónur, men P/f Eystur- og Sandoyartunlar rinda 12 milliónir av teimum 40.

Fleiri treytir

Vinnuøkið verður slakar 35.000 fermetrar og grótbrotið slakar 19.000 fermetrar. Men tað er ikki bara sum at siga tað at gera vinnuøki við Gomlurætt.

Byggisamtyktin fyri økið má broytast. Loyvi máa fáast frá friðingarmyndugleikum. Umhvørvisstovan má geva loyvi til at fylla grót út á sjógv og Landsverk eigur økið.

Umhvørvisstovan hevur longu gjørt eina árinsmeting á staðnum. Umhvørvisstovan heldur ikki, at ætlanin fer at ávirka munandi náttúru og umhvørvi.