– Sannlíkindini fyri nýggjari avtalu góð

Bretski forsætisráðharrin, Boris Johnson, sigur nú, at sannlíkindini fyri, at Bretland fær eina nýggja avtalu við ES um Brexit, eru góð, skrivar danska kringvarpið, DR.

Boris Johnson segði á tíðindafundi í gjár, at hann heldur, at ES er til reiðar at gera ein nýggja avtalu, tí Bretland fyrireikar seg til at fara úr evropeiska samveldinum við ongari avtalu 31. oktober.

Boris Johnson sigur, at hann vónar at fáa eina nýggja avtalu í lag, tá toppfundur verður aftur í ES. Hann ger samstundis greitt, at hann fer ongantíð at biðja ES um at útseta Brexit. Ikki øll eru sannførd um, at Boris Johnson fer at arbeiða fyri einari nýggjari avtalu við ES.

Labour og Konservativu arbeiða við uppskoti

–  Tað er greitt, at hann hevur onga ætlan um at fáa eina avtalu í lag. Hann er til reiðar at tveita Bretland út av eggini 31. oktober, og tað eigur hann ikki at sleppa, sigur fyrstiráðharrin í Skotlandi, Nicola Sturgeon. 

Andstøðuflokkurin Labour og konservativir parlamentslimir, sum eru ímóti, at Bretland skal fara úr ES við ongari avtalu, arbeiða við einum uppskoti, sum skal forða fyri, at Bretland fer úr ES, uttan so at ein avtala er gjørd frammanundan.

Bretskir miðlar gittu allan gjár, at Boris Johnson fór at útskriva parlamentsval, men tað vísir forsætisráðharrin aftur. Eg vil ikki hava val, og tað vilja tit heldur ikki, segði hann við tíðindafólk.