Størri skattalætta til hægru inntøkurnar

<p>Norðmenn, sum hava eina meðalinntøku, kunnu vænta sær 1600 krónur í skattalætta næsta ár, men tey, sum forvinna meiri enn tvær milliónir kr. um árið, fáa størsta skattalættan, skrivar NRK.</p>

<p>Sambært fíggjarlógaruppskotinum, sum stjórnin legði fyri Stórtingið í dag, fáa fólk, sum forvinna 150.000 kr., 500 kr. í skattalætta.&nbsp;Tey, sum forvinna meiri enn tvær milliónir, fáa 38.400 krónur minni í skatti.</p>

<p>Stjórnin ætlar at nýta 164 milliardir krónur úr oljugrunninum, sum eigur 5.000 milliardir kr., sambært uppskotinum. Tað eru trý prosent meiri enn í fjør, og tað er fyrstu ferð, at meiri enn 150 milliardir krónur verða nýttar úr oljugrunninum í einum ári.</p>