Løgmaður kann ikki kanna øll mál hjá Anitu

Løgmaður hevur onga yvirskipaða heimild at kanna øll viðurskifti hjá garnaskipinum Anitu. Tað mugu avvarðandi myndugleikar gera.

Og teir myndugleikarnir eru nógvir, teir eru níggju í tali, bæði føroyskir og danskir.

Tað sigur Kaj Leo Holm Johannesen, løgmaður, í svari til Gunvør Balle, løgtingskvinnu. 

Hon spurdi, um løgmaður hevði viljað sett kanning í verk, so almenningurin og løgtingið kunnu fáa heildarmynd og fullfíggjaða frágreiðing um, hvat er hent í málinum viðvíkjandi Anitu.

Men slíka kanning fær løgmaður ikki gjørt, tí hann hevur ikki heimildina, sigur hann í svarinum.

Sjey spurnartekin

Hann nevnir sjálvur sjey viðurskifti hjá Anitu, sum spurnartekin eru sett við. 

Tey eru: trygd á sjónum, lógin um vinnuligan fiskiskap, arbeiðs- og uppihaldsloyvi, leiðslan á Anitu, ognarrættarligu viðurskiftini og bygnaðurin í P/f Seta, sum eigur Anitu, skattligir trupulleikar og sosial dumping. 

Um skattligu viðurskiftini stendur í svarinum hjá løgmanni, at sagt hevur verið, at tey eru ullint. Millum annað
fær reiðarin onga løn, og P/f Seta hevur nógv minni vinning enn tilsvarandi feløg hava. 

Loyvið tikið fyribils 

Løgmaður hevur avgjørt at taka øll føroysk loyvi hjá Anitu at fiska fyribils, til dómur er fallin í málinum um seks brot á kunngerðina um fiskiskap eftir havtasku og svartkalva við gørnum á føroysku landleiðini.

Fútin ákærdi fyrr í ár reiðaran og skiparan á Anitu. Ikki er greitt enn, nær Føroya rættur fer at viðgera málið.

Sambært avgerðini hjá løgmanni skal Anita gevast at fiska á midnátt fríggjakvøldið. 

P/f Seta kann leggja avgerðina hjá løgmanni fyri Føroya rætt.