Óvist hvussu nógv skal gjaldast í rentum

Veruligar samráðingar hava ikki verið enn við tey, sum vilja fíggja tunlarnar. Men ábendingar eru um, at felagið kann fáa fígging við lagaligum treytum, eisini rentutreytum.

Metingar um rentukostnað eru tær somu sum tær vóru, tá felagið P/f Eysturoyar- og Sandoyartunlar varð stovnað fyri einum ári síðani.

Tað sigur Jørgen Niclasen, landsstýrismaður, sum hevur svarað spurningi frá Kára P. Højgaard, løgtingsmanni, um rentukostnaðin fyri undirsjóvartunlarnar.

1,3 mia. í langtíðarløguætlan

Tingmaðurin spurdi eisini um atknýttar verkætlanir hjá Eysturoyartunlinum, tað eru vegir, sum skulu gerast. Jørgen Niclasen svarar, at P/f Eysturoyar- og Sandoyartunlar hava ábyrgd av at knýta Eysturoyartunnilin í verandi landsvegakervi.

Ongar atknýttar verkætlanir eru. Men, leggur landsstýrismaðurin so afturat, so hevur samgongan sett 1,3 milliardir krónur í langtíðarløguætlan til 2024 til nýggjar landsvegir og annað.

Summar av hesum verkætlanunum eru í ávísan mun knýttar at Eysturoyartunlinum og broytingini í ferðslumynstrinum, sum tunnilin fer at hava við sær, stendur í svarinum.