Amerikonsk stríðsflogfør aftur í Keflavík

NATO upplýsir, at amerikanska sjóverjan hevur biðið um at fáa 21 milliónir dollarar til Keflavík-støðina í Íslandi orsakað av økta kavbátavirkseminum hjá Russlandi.  

Í farnu viku upplýsti NATO, at fýra F-15C Eagle-flogfør verða send til Íslands. Amerikonsku stríðsflogførini skulu hava støð í Keflavík.

Hert eftirlit við havøkinum

Stríðsflogførini skulu hjálpa til við at halda íslendska luftrúmið trygt, stendur í tíðindaskrivi frá høvuðsstøðini hjá NATO.

Økta virksemið hjá Russlandi norðan fyri Ísland hevur elvt til størri eftirlit við havleiðunum millum Grønland, Ísland og Bretland.

Russisku kavbátarnir hava langtberandi vápn, ið eru sera neyv, og russisk langtberandi bumbumflogfør hava eisini flogið norðanfyri, skrivar norska TV2.

Einki virksemi í 10 ár

Í november flugu tvey russisk TU-160 Blackjack-flogfør yvir norsku strondini móti Íslandi, áðrenn tey settu kós móti Gibraltar og síðani víðari til Sýria við krússararakettum í lastini. 

Í Keflavík fer USA at uppstiga hangarin til eisini at kunna hýsa einum eftirlitsflogfari. Í 2006 løgdu amerikanarar Keflavík-støðina niður. Nú verður støðin mannað við 160 starvsfólkum.

Undir Kalda Krígnum hevði støðin í Keflavík stóran týdning fyri USA og NATO, og nærum 5.000 amerikanarar vóru á støðini í Keflavík.