Stjórnarskipanin skal tryggja bankan

Kristina Háfoss heldur, at Landsbankin og Búskapargrunnurin skulu tryggjast betur enn við vanligari løgtingslóg. Hon vónar, tað verður partur av endaliga uppskotinum, sum fer til fólkaatkvøðu næsta ár.

Soleiðis slepst undan, at Landsbanki Føroya verður avtikin og stovnsettur aftur innan stutt áramál, heldur landsstýriskvinnan.

Halda Landsbankin er óneyðugur

Tá Løgtingið arbeiddi við at samtykkja stjórnarskipan í 2011, var ein grein til Landsbanka Føroya, og ein grein til Búskapargrunn Føroya.

Bárður á Steig Nielsen, formaður í Sambandsflokkinum, og Jørgen Niclasen, formaður í Fólkaflokkinum, hava fyrr sagt, at Landsbankanum er ikki lív lagað, verður hann endurstovnaður.

Tað halda teir, tí breið semja er ikki um at endurstova Landsbankan. Bæði Sambandsflokkurin og Fólkaflokkurin halda, at Landsbanki Føroya er óneyðugur og dýrur symbolpolitikkur.