Føroysku bankarnir steingja gjaldkort

Hevur tú eitt gjaldkort, sum tað ikki riggar at gjalda við í dag, so kann grundin vera, at bankin tilætlað hevur stongt títt gjaldkort.

Eik steingir nú 100 gjaldkort, boðar bankin frá á heimasíðuni. Eisini hjá Norðoya Sparikassa eru Visa Dankort sperrað, sigur bankin.

SÍ EISINI Føroysk gjaldkort kanska misnýtt

Føroysku gjaldkortini verða sperrað, eftir at tað í síðstu viku kom fram, at teldusníkar kunnu hava fingið fatur á kortupplýsingum.

Fyribils er talan "bara" um Visa Dankort, og ikki Mastercard. Bankin ringir í dag til teirra, ið hava eitt gjaldkort, sum verður sperrað, sigur bankin.

Útlendskur nethandil syndarin

Danska fyritøkan, Nets, mælti í síðstu viku til, at 100.000 donsk gjaldkort skuldu sperrast, tí illgruni var um, at upplýsingar vóru komnar í skeivar hendur.

Tá boðaði Eik frá, at tað ikki var óhugsandi, at teldusníkar eisini høvdu fingið fatur á upplýsingum um føroyskar kundar. Soleiðis er eisini eftir øllum at døma.

Nets upplýsir ikki, hvussu teldusníkarnir kunnu hava fingið fatur á kortupplýsingum hjá kundum. Bara, at talan er um ein útlendskan nethandil.