Býráðið vil hava fund við fútan um oljudálkingina

Politiið hevur handfarið málið um oljudálkingina illa.

Tað sigur advokaturin hjá Tvøroyrar kommunu í einari kunning til býráðið á Tvøroyri.  

Málið um oljudálkingina var á skránni fyri býráðsfundin á Tvøroyri mánadagin. Har var kunning frá advokatinum hjá kommununi viðgjørd.

Samtykt varð at biðja fútan um fund um málið.

Býráðið á Tvøroyri hevur ikki slept vónini um at fáa pengarnar aftur, sum kommunan brúkti fyri skjótt fýra árum síðani til at taka upp tungolju, sum var farin á sjógv við Krambatanga, og reinsa fjøruna har á leiðini.

Hálv millión

Hetta kostaði kommununi hálva millión krónur.

Tá, seint í september 2013, vórðu royndir tiknar av olju frá trimum skipum, sum kundu havt dálkað, men eingi prógv fingust fyri, at nakað av skipunum hevði dálkað.

Av tí at ongantíð er staðfest, hvør dálkaði við Krambatanga, hevur kommunan ongan at krevja eftir pengunum.

Í kunngerðini um oljudálking stendur, at um eingin kann skuldsetast fyri at hava dálkað, eiga landið og kommunan í felag at átaka sær útreiðslurnar av at rudda og reinsa.

Tvøroyrar kommuna hevur roynt at fáa landið at gjalda sín part, men tað er til fánýtis, sigur Kristin Michelsen, borgarstjóri.