Nýggj høli til nýggjar kommunulæknar í Havn

Borgarstjórin í Havn, Annika Olsen, viðgongur, at kommunan hevur ikki givið kommunulæknunum Havn nóg góðar umstøður.

- Kommunan hevur ábyrgd av at veita kommunulæknum viðtaluhøli og útgerð. 
Her má ásannast, at kommunan hevur ikki røkt hesa uppgávu nóg væl. 
Nakrar viðtalur eru heilt einfalt ikki í nøktandi standi, sigur Annika Olsen. 

Hon leggur afturat, at Tórshavnar kommuna fer at gera sítt til, at øll kommunulæknaskipanin í Havn kemur upp á nútíðarstig. 

Kommunan er tí farin í gongd við at skipa nýggjar læknaviðtalur til teir nýggju læknarnar.

Og gomul viðtaluhøli verða stongd.

Kunngjørt um tríggjar vikur

Hvussu hetta verður gjørt, verður kunngjørt hálvan desember, sigur Annika Olsen.

Tað er vorðið striltið at fáa kommunulæknar í Havn, tí ov nógv er at gera, og arbeiðsumstøðurnar eru ikki í lagi. 

Tórshavnar býráð hevur heitt á Heilsumálaráðið um at fáa fleiri læknar í Havn. 

Nú verður søkt eftir trimum kommunulæknum og ætlandi verður søkt eftir tveimum læknum afturat seinni, sigur borgarstjórin.