- Tíðindi, mentan og ítróttur
Støðan í Chicago er hættislig
11 fólk eru skotin og dripin, 70 onnur eru særd í skotbardugunum, sum hava verið hetta vikuskiftið. Bara sunnudagin vóru 44 fólk rakt av skotum eftir 13 tímum.
Nú boðar løgregluovastin Eddie Johnson frá, at 400 løgreglufólk koma harðast raktu pørtunum av býnum til hjálpar beinanvegin, og so koma 200 løgreglufólk afturat til vikuskiftið.
Millum teirra, sum lógu eftir á eftir skotriðurnar, eru fólk sum eru 11 og 63 ár. Ein tannáringur var skotin og dripin, tá hann súkklaði ein túr seinnapartin sunnudagin, umframt tað varð skotið við eina jarðarferð og eina veitslu.
Higartil í ár eru 320 fólk skotin og dripin í Chicago, sum er triðstørsti býurin í USA. Hetta skriva millum annað Ritzau, AFP og DR.
Seinastu 15 árini eru fleiri amerikanarar dripnir í býnum Chicago enn í Afganistan og Irak tilsamans.
Býurin hevur fingið keðiliga eyknevni "Chiraq" við ávísing til krígsøkið í Irak. Tølini vísa, at tað kemur ikki av ongum, sambært keldum sum CNN, Washington Post og BBC.
762 fólk doyðu av skotum í Chicago í 2016, og í fjør doyðu 650 fólk, og tað er meira enn í New York og Los Angeles tilsamans.
Tølini vísa enntá, at frá 2001 til 2016 eru fleiri fólk deyð av skotum í Chicago, enn tað doyðu amerikanskir hermenn doyðu í Irak, skrivar BBC.