Hálvt ár í fongsul fyri at brúka køksknív

Ein maður hevur í Føroya rætti fingið seks mánaða fongsulsrevsing fyri grovan harðskap.

Hetta hendi í einari veitslu nýggjársmorgun. 

Ákæruvaldið og Føroya rættur gjørdu skjott av. Dómurin fall 18.januar.

Tann ákærdi - og nú dømdi - noktar seg sekan, tí hann sigur seg einki minnast. 

Maðurin er dømdur fyri at skera ein annan í vinstru hond við einum stórum køksknívi, so fingrar blivu skaddir. 

Frídømdur fyri roynd

Rætturin herdi revsingina, tí hevði skorni maðurin ikki sett hondina fyri andlitið, hevði knívurin mest sannlíkt rakt hann í andlitið ella í hálsin.

Og vandi er fyri, at álopni maðurin fær varandi mein í hondina.

Maðurin varð eisini ákærdur fyri eina roynd at fremja grovan harðskap, tí hann ætlaði at brúka køksknívin móti einum øðrum manni um somu tíð.

Men hann er frídømdur fyri hetta, tí tann ákæran er ikki prógvað, sigur Føroya rættur.

Maðurin, sum hevur verið í varðhaldi síðani nýggjársdag, er eisini dømdur at gjalda sakarkostnaðin.