Makrelkanningin er byrjað

Árliga altjóða makrelkanningin er byrjað.

Seks skip eru við í kanningini, sum byrjaði fríggjadagin, tá føroyska skipið, Finnur Fríði, byrjaði sunnanfyri.

Hini skipini eru úr Íslandi, Danmark, Noregi og Grønlandi.

Í hesari vikuni byrja fýra skip, eitt í Norðsjónum, eitt norðan fyri Ísland og tvey í Norðurhavi. 

Sætta skipið fer at gera kanningar í grønlendskum øki seinni í juli.

Í hesum árligu makrelkanningunum verður vistskipanin lýst við serligum denti á makrel í Norðurhøvum.

Kanna eisini annað

Talan er um yvirlitstroling eftir makreli, umframt ekkókanningar av sild og svartkjafti. 

Umhvørviskanningar verða eisini gjørdar, har salt og hiti verða mátað niður á 500 metra dýpi.

Djóraæti verður kannað við glúpi.

Úrslitið verður brúkt, tá makrelurin skal stovnsmetast seinni í summar. 

Í ár ber til at síggja, hvar kanningarskipini eru stødd, og hvussu langt tey eru komin við kanningunum. 

Leinki til kort við kanningargongdini er hjá Havstovuni, hav.fo.