USA stevnir Edward Snowden

Amerikanska løgmálaráðið hevur stevnt amerikanska varskógvaranum, Edward Snowden, sum í gjár gav út bókina, Permanent Record. 

Løgmálaráðið sigur, at endamálið við stevningini er ikki, at steðga útgávuni av nýggju bókini hjá Edward Snowden, skrivar tíðindastovan Ritzau.

 >> SÍ EISINI Stúrir fyri órættvísari rættargongd

Hinvegin verður sagt, at Snowden skal hava skrivað undir trúnaðaravtalu bæði hjá amerikonsku fregnartænastuni, CIA, og hjá altjóða trygdarstovninum, NSA, har Snowden fyrr arbeiddi.

Sambært stevningini hevur Snowden ikki givið myndugleikunum møguleika, at lesa bókina áðrenn, sambært trúnaðaravtalunum.

– Vit loyva ikki einstaklingum - fyri amerikanska rokning - at forvinna pening uttan, at halda krøvni um rættlestur og skoðan áðrenn útgávuna, sigur Jody Hunt frá løgmálaráðnum.

Í útlegd í seks ár

USA krevur, at fáa allan vinningin frá søluni av nýggju bókini. Edward Snowden gjørdist heimskendur, tá hann í 2013 lak trúnaðarupplýsingar um, hvussu amerikanskir myndugleikar njósnast.

Edward Snowden segði, at amerikanska fregnartænastan framdi umfatandi internet- og telefoneftirlit. Hann hevur búð í útlegd í Moskva síðani 2013, og er framvegis í Moskva.

Bókin er endurminning hjá Snowden og gevur innlit í barna- og ungdómsárini, og hvussu hann var við til at menna víðfevndu eftirlitsskipanina, og hví hann at enda var noyddur, at siga øllum heiminum frá tí.