Zuma skal fyri rættin

Fyrrverandi forsetin í Suðurafrika, Jacob Zuma, skal fyri rættin, ákærdur fyri korrupsjón. Tað hevur ein kærudómstólur gjørt av.

Zuma bað um, at sakarmálið varð slept, men tað sýtti kærudómstólurin fyri, tí byrjar rættarmálið móti fyrrverandi forsetanum týsdagin.

Ákærurnar í 16 punktum

Zuma er millum annað ákærdur fyri at hava tikið ímóti mutri frá einari franskari vápnafyritøku í nítiárunum. Ákærurnar eru í 16 punktum, og tær eru um mutur, svik og peningahvítting.

Zuma sigur, at ákærurnar hava politiskt endamál, og hann vísir aftur at hava gjørt nakað ólógligt. Zuma sigur, at rættarmálið er órættvíst, tí tað er útsett í fleiri ár.

Jacob Zuma var forseti í Suðurafrika frá 2009 til 2018. Hann varð noyddur at leggja frá sær í februar í fjør, og síðani hevur Cyril Ramaphosa verið forseti í Suðurafrika.