Grønland: Demokratarnir farnir upp í landsstýrið

Demokratarnir í Grønlandi eru nú farnir upp í landsstýrissamstarvið, saman við Siumut og Nunatta Qitornai. Frammanundan vóru Demokratarnir stuðulsflokkurhjá landsstýrinum.

Kim Kielsen, landsstýrisformaður, fegnast um, at landsstýrið nú hevur fingið størri grundarlag at virka á.

- Hetta er ein stórur dagur fyri Demokratarnar. Vit kundu valt at verið uttanfyri, men tað hevði ikki verið rætt. Vit vilja gera okkara til, at samfelagið kemur ígjøgnum koronakreppuna, sigur virkandi forkvinnan hjá Demokratunum, Nivi Olsen.

Formaðurin í Nunatta Qitornaii, Vittus Kujakitsoq, fegnast eisini um, at Demokratarnir eru komnir upp í landsstýrissamgonguna, tí tað fer at gera arbeiðið lættari, og at verulig gongd fer at koma á mál, sum Demokratarnir hava tikið undir við, m.a. flogvallarmálið.

Trý landsstýrisfólk

Demokratarnir fáa trý landsstýrisfólk. Steen Lynge fær ábyrgd av uttanríkisviðurskiftum og orku, Anna Wangenheim verður landsstýriskvinna í heilsumálum, og floksskrivarin, Jens Frederik Nielsen, fær ábyrgd av vinnu og ráevnum.

Virkandi forkvinnan hjá Demokratunum, Nivi Olsen, hevur avgjørt ikki at vera partur av grønlendska landsstýrinum, skrivar KNR.

Hetta er fjórðu ferð, at grønlendska landsstýrið verður broytt, síðani seinasta landstingsval.