Tunlarnir norður um Fjall kosta 522 mió. kr.

Jørgen Niclasen, landsstýrismaður, bað í gjár løgtingið hækka játtanina til tunlarnar norður um Fjall upp í 522 mió. kr.

Sambært verklagslógini frá 2009 eru settar av 252 mió. kr.

Verkætlanin var tá klár at bjóða út í 2010, men tað varð av ongum. 

Nú er kostnaðarmetingin dagførd, og verkætlanin er tann sama sum fyri tíggju árum síðani.

Trý biðin um tilboð

Fýra feløg buðu sær til at vera við í undangóðkenningini at geva tilboð upp á høvuðsarbeiðstøkuna.

Trý teirra eru biðin um tilboð.

Farið verður undir at gera arbeiðsvegir longu í ár, sigur landsstýrið.

Frá 2009 til 2011 vórðu brúktar tríggjar milliónir krónur til tunlarnar norður um Fjall, 670.000 kr. í 2019, og í ár eru játtaðar 15 mió. kr. Fimm eru brúktar, og tíggju vera fluttar til næsta ár.