Fólkaflokkurin í Sandoynni vil hava landsstýrisumboð

Nú Fólkaflokkurin telvar um, hvør skal manna landsstýrisessirnar hjá Jacobi Vestergaard og Elsebeth Mercedis Gunnleygsdóttir, ger fólkafloksfelagið í Sandoynni vart við seg.

Ingimar Tór Thomsen, formaður í Sandoyar Fólkafloksfelag, sigur í einum almennum skrivi í dag, at verður telvað so, at Sandoyggin verður sett uttanfyri og onga umboðan fær, fær tað vanlukkuligar avleiðingar fyri Fólkaflokkin í oynni, og fer uttan iva at fáa stóra neiliga ávirkan á flokkin.

Ingimar Tór Thomsen vísir á, at umboðið hjá Fólkaflokkinum á tingi, Brandur Sandoy, hevur verið borgarstjóri í 10 ár og tingmaður í seks ár, men hann endaði úti í kuldanum, tá landsstýrisfólkini fóru aftur í tingið.

Ikki spælt seg av A-liðnum

"Hann hevur havt stóran týdning fyri oynna, og hevur á ongan hátt spælt seg av A-liðnum, og verður hann settur av liðnum, meðan onnur fólk, óroynd í politikki, verða tikin framum, verður tað við garanti at falla í ringa jørð í Sandoynni," skrivar Ingimar Tór Thomsen.

Og hann leggur aftrat:

"Verður telvað so, at vit her suðuri vera sett totalt uttanfyri, og onga umboðan koma at hava, um tað so er verandi umboð, ella okkurt annað, kemur hetta at hava katastrofalar avleiðingar fyri flokkin í oynni, og fer uttan iva at fáa stóra neiliga ávirkan á Fólkaflokkin."

Í løtuni eru, sum skilst, Beinir Johannesen og Sólvit Nolsø í uppskoti at gerast landsstýrismenn, og væntandi fer Fólkaflokkurin at taka endaliga støðu til málið í kvøld.