Kekkia og Kosovo mótstøðulið í november

Kekkia og Kosovo vera mótstøðulið, tá føroyska fótbóltslandsliðið við monnum skal spæla tveir venjingardystir í november, skrivar fsf.fo.

Dystirnir verða 16. og 19. november.

Lagt verður fyri á útivølli ímóti Kekkia í Olomouc eystarliga í landinum. Síðan verður farið til Pristina í Kosovo, har seinni venjingardysturin verður spældur.

Dysturin ímóti Kekkia var avtalaður, áðrenn londini bæði endaðu í sama bólki til EM-undankappingina, skrivar Fótbóltssambandið.

Á seinasta styrkislista hjá FIFA er Kekkia nummar 35 í heiminum, meðan landsliðið hjá Kosovo er á 107. plássi av teimum 211 londunum, sum eru limir í altjóða fótbóltssamgonguni. Føroyar eru í løtuni nummar 122 á listanum.

Føroyar hava spælt fýra ferðir ímóti Kekkia og tríggjar ferðir ímóti Kosovo. 

Hópurin til nevndu landsdystir verður kunngjørdur á tíðindafundi í FSF-húsinum mánadagin 31. oktober.