Christian í Grótinum kann eiga bæði í EFFO og Magn

Gongst sum ætlað hjá samtakinum Christiani í Grótinum í Klaksvík at keypa 56 prosent av partabrøvunum í Orkufelagnum, sum eigur MAGN, t.e. at íslendsku eigararnir taka av tilboðnum, og Kappingareftirlitið góðtekur keypið, so eigur samtakið í báðum teimum stóru oljufeløgunum. 

Boðið hjá Christiani í Grótinum er 170 mió. kr. 

Gjøgnum ognarskap í øðrum feløgum eigur samtakið nevniliga longu ein part í oljufelagnum EFFO. 

Sambært eigaraupplýsingum hjá Skráseting Føroya, eigur Palli hjá Mariannu, sum er móðurfelagið hjá Christiani í Grótinum, átta prosent í føroyska íløgufelagnum Tjaldur. 

Eitt av dótturfeløgunum hjá Tjaldri er Sp/f. Kolan við heimstaði á Bryggjubakka 22 í Havn.

Tað felagið eigur 68,5 prosent í danska felagnum við sama navni, Kolan ApS. Gullak Madsen eigur restina av partabrøvunum í danska felagnum. 

ApS Kolan - tað danska felagið - eigur 52 prosent av føroyska orkufelagnum EFFO.